Prishtinë – Me rastin e Ditës Botërore të Gazetarëve Sportivë, më 2 korrik, Agim Ademi, Kryetar i Federatës së Futbollit të Kosovës, ka përkujtuar rolin e rëndësishëm të gazetarisë sportive në zhvillimin dhe promovimin e sportit, veçanërisht futbollit në Kosovë.
Në një mesazh të veçantë, Ademi thekson se futbolli është më shumë se një lojë është pasion dhe identitet për shumë njerëz, dhe gazetaria sportive është ura që lidh tifozët me fushën e lojës. Ai nënvizon përkushtimin e gazetarëve për të sjellë në çdo shtëpi emocione dhe dokumentimin e sukseseve dhe sfidave të sportistëve.
Ademi shpreh mirënjohje për punën e palodhur të gazetarëve, shpesh në kushte të vështira, dhe i inkurajon ata të qëndrojnë besnikë ndaj etikës profesionale, duke shmangur senzacionet që dëmtojnë imazhin e sportit dhe gazetarisë.
“Gazetaria sportive nuk është thjesht informim, por edhe përgjegjësi,” thotë Ademi, duke e konsideruar gazetarinë si partner të rëndësishëm në misionin për rritjen e futbollit në Kosovë.
Në përfundim, ai uron të gjithë gazetarët sportivë me shëndet, suksese dhe frymëzim të vazhdueshëm në punën e tyre.