I ardhur rastësisht në FFK, pa qenë asnjëherë futbollist apo punëtor e drejtues i ndonjë klubi futbolli, Taulant Hodaj, i cili herë prezantohej si sekretar e herë si ushtrues detyre i sekretarit të FFK-së, sot sipas një medniumi, ai ka shprehur dëshirën për të marrë drejtimin e futbollit kosovar.
Ai mbahet mend për arrogancën e tij në emisionet televizive, derisa sot më shumë duket si kandidat nga studiot televizive, pasi që anëtarësia futbollit thuajase njëzëri përkrahin hapur presidentin aktual, Agim Ademi!
Një gaf e madhe e Hodajt ishte pohimi kur thoshte se rezultati përfundimtar i ndeshjes Rumania dhe Kosova do të ishte në favor të Kosovës, por në fund ndeshja u regjistrua me rezultat zyrtar 3:0 për Rumaninë. Këtu u tregua injoranca sa është larg futbollit!
Pas këtij rasti, kishte shpërthyer pakënaqësia e drejtuesve të FFK-së ndaj Hodajt dhe bashkëpunimi me të nuk u vazhdua.
Pas kësaj, Hodaj doli hapur kundër FFK-së në media, ndonëse deri atëherë mbronte çdo vendim të këtij institucioni, duke sulmuar edhe Ministrinë e Sporteve. Sot bën të kundërtën.
Duke i bërë lajka ministrit në publik, ai përpiqet të ndikojë politikisht kundër Kuvendit Zgjedhor të FFK-së.
Ndërkohë, FFK-ja është e bindur se statuti i saj është në harmoni të plotë me legjislacionin e Kosovës dhe me rregulloret e UEFA-s dhe FIFA-s.
Çdo ndërhyrje politike do ta dëmtonte rëndë futbollin kosovar, madje mund të sillte edhe përjashtim nga garat ndërkombëtare, pikërisht në një moment kur Kosova është vetëm dy ndeshje larg kualifikimit në Kupën e Botës.