Federata e Futbollit të Kosovës organizoi sonte koktejin tradicional të fundvitit me gazetare.
Presidenti i FFK-së, Agim Ademi, në fjalën e tij tha se gazetarët çdo ditë i japin zë, emocion dhe kuptim sportit tonë, futbollit.
“Gazetarët sportivë janë ura mes sportistëve dhe publikut, zëri i së vërtetës në momentet e vështira, kritikuesit që na bëjnë të reflektojmë dhe motivuesit me raportimet korrekte. Me profesionalizmin, pasionin dhe përkushtimin e tyre, ata e mbajnë sportin gjallë, e pasurojnë me histori dhe e bëjnë më të ndjeshëm për çdo tifoz”, ka theksuar ai.
Ademi ka thënë se ky takim i sotëm, në vigjilje të festave të fundvitit, ishte një moment mirënjohjeje për punën e palodhur që ata bëjnë.
“Pa ta, emocionet nuk do të kishin të njëjtën peshë, fitoret nuk do të kumbonin njësoj dhe sakrificat nuk do të merrnin vlerën që meritojnë. Falënderim i sinqertë për bashkëpunimin, për korrektësinë dhe për pasionin që sillni çdo ditë. Ju jeni pjesë thelbësore e sportit dhe e historisë së tij”, ka deklaruar Ademi.