Federata e Futbollit të Kosovës ishte pjesë e Kongresit të 49-të të UEFA-s, mbajtur në Beograd, ku delegacioni ynë, i kryesuar nga presidenti Agim Ademi dhe u.d. sekretari i përgjithshëm, Markus Weidner, përfaqësoi Kosovën me dinjitet dhe në përputhje të plotë me statusin tonë si anëtare e barabartë në UEFA dhe FIFA.

Në këtë ngjarje të rëndësishme të futbollit evropian, ashtu si çdo federatë tjetër anëtare, Kosova u prezantua me simbolet e saj shtetërore, teksa konfirmoi edhe një herë përkushtimin e saj për zhvillimin e futbollit dhe forcimin e bashkëpunimit me institucionet ndërkombëtare.

Deklaratat e pabaza të Federatës së Futbollit të Serbisë, që synuan ta paraqesin pjesëmarrjen tonë si diçka jashtë interesit të futbollit, nuk kanë asnjë bazë dhe vetëm sa dëshmojnë tendencën e vazhdueshme të përzierjes së politikës në sport nga ana e Serbisë.

FFK-ja gjithmonë ka përfaqësuar interesat e futbollit të Kosovës dhe do të vazhdojë të punojë për zhvillimin dhe avancimin e lojës së futbollit, duke mbajtur marrëdhënie të shkëlqyera me institucionet ndërkombëtare.

E kuptojmë se prania e delegacionit të Kosovës në kryeqytetin serb, si dhe fakti që flamuri i shtetit tonë valëviti përkrah atyre të shteteve të tjera, vazhdon të jetë i papranueshëm për politikën dhe një pjesë të opinionit në Serbi. Megjithatë, shteti i Kosovës është një realitet i pakthyeshëm dhe sa më shpejt që ta pranojnë këtë, aq më shpejt do të kontribuojnë në normalizimin e marrëdhënieve sportive dhe shtetërore.

Sa i përket pretendimeve për largimin e flamurit shtetëror të Kosovës gjatë punimeve të Kongresit, theksojmë se Kosova ishte e përfaqësuar zyrtarisht me simbolet e saj shtetërore, njësoj si çdo anëtare tjetër e UEFA-s. Çdo veprim i mundshëm në përfundim të mbledhjes, kur presidenti i FFK-së nuk ishte më në sallë, nuk e ndryshon faktin se Kosova ishte dhe mbetet pjesë e barabartë e këtij organizimi, ashtu siç është në familjen e futbollit evropian dhe botëror.

Sigurisht, si gjithmonë, persona të caktuar ndjekin agjenda kundër Kosovës dhe largojnë nga tavolina, madje edhe djegin flamurin e shtetit tonë (siç ndodhi mbrëmë në Beograd nga tifozë të klubeve serbe), por Kosova si shtet është dhe mbetet një realitet i pakthyeshëm. FFK-ja menjëherë do të paraqesë notë proteste në UEFA dhe institucionet tjera ndërkombëtare lidhur me këto veprime, që janë kundër vlerave që promovon UEFA.

Gjithsesi, edhe një herë ritheksojmë se Kosova u prezantua si e barabartë me të gjitha simbolet e saj dhe gjithçka ka shkuar sipas protokollit të UEFA-s deri në pjesën përfundimtare të punimeve.

FFK-ja falënderon UEFA-n për trajtimin e mirë dhe mbështetjen e vazhdueshme për zhvillimin e futbollit në Kosovë. Si gjithmonë, ne do të vazhdojmë të punojmë për ta forcuar futbollin tonë dhe për ta përfaqësuar Kosovën me dinjitet në arenën ndërkombëtare.

Përzgjedhësi i Kombëtares së Kosovës për vajza, Sami Sermaxhaj, ka publikuar listën e Dardaneve për ndeshjen e muajit prill të Ligës së Kombeve.

Dardanet do të takohen me Maqedoninë e Veriut, me 8 prill, në stadiumin “Fadil Vokrri” në Prishtinë

Kombëtarja e vajzave e Kosovës është pjesë e Ligës C, Grupi C6, së bashku me Maqedoninë e Veriut dhe Letoninë.

Në dy ndeshjet e para Kosova ka regjistruar një fitore e një humbje.

Mediat në Angli i kanë dhënë bujë të madhe, portierit të kombëtares së Kosovës, Arijanet Muriq, i cili është gjobitur disa herë gjatë vitit kaluar, për shkelje të rregullave të komunikacionit.

BBC-ja, raporton se një portier i një klubi të Premier Leagues, është gjobitur me më shumë se 23,000 funtash, për shkelje të rregullave, gjatë vozitjes.

26 vjeçari që luan për Ipswich Town, u akuzua për vozitje pa sigurim të palës së tretë me makinën Bentley. Ai gjithashtu u dënuar edhe për përdorimin e telefonit gjatë vozitjes.

Murici, pranoi gabimet dhe u gjobit me mbi 20 mijë euro duke iu marrë edhe gjashtë pikë në patentën e tij për shkeljen e sigurimit në një gjykatë të martën.

Këto shkelje ndodhën në gusht të vitit të kaluar.

Aro Muriq që është i rregullt te përfaqësuesja e Kosovës, kaloi te Ipswich Town nga Burnley vitin e kaluar në një marrëveshje prej gati 15 milionë sterlinash.

Federata e Futbollit të Kosovës dhe sponsori i Superligës, Albi Mall, vazhdojnë të ndajnë çmimin “Ylli i Javës”. Ky çmim për javën e 26-të në Albi Mall Superligë i është ndarë futbollistit të FC Prishtina, Ron Raçi.

Vlerësimi i më të mirit të javës është bërë nga Komisioni i Veteranëve të Futbollit, në përbërje të Avni Shala, Enes Shosholli dhe Vllaznim Visoka. Ky komision vendosi që çmimi “Ylli i Javës” për xhiron e njëzet e gjashtë t’i takojë mbrojtësit Raçi, i cili me golin e tij i mundësoj Prishtinës të arkëtoj tre pikë në fitoren kundër FC Feronikeli 74, e cila përfundoi me rezultat 2:1.

Pasi mori këtë çmim, Roni u shpreh i lumtur që u vlerësua si më i miri i javës: “Kemi pasur kohë të mjaftueshme për ta përgatitur ndeshjen, e cila ishte mjaft e rëndësishme.

E dimë që pas një kohe të gjatë nuk kemi qenë mirë me rezultate, por shpresoj që kjo fitore të na japë më shumë motiv dhe të jetë një pikë kthese për rezultatet pozitive.

Objektivi ynë është dalja në Evropë dhe shpresoj që me këtë formë mund ta arrijmë. Jam shumë i lumtur për golin dhe që arrita ta ndihmoj ekipin, mirëpo edhe më i lumtur jam për tre pikët. Merita shkon për bashkëlojtarët e mi dhe stafin, sepse pa ta kjo fitore nuk do të ishte e mundur.

Një falënderim i veçantë për Federatën e Futbollit dhe komisionin që më vlerësuan me këtë çmim, i cili është një motiv shtesë për mua. Mua më mbetet të punoj fort, të ndihmoj ekipin aq sa mundem dhe të vazhdojmë drejt objektivave tona”, tha ai për faqen zyrtare të FFK-së.

Bordi i Shoqatës së Trajnerëve në bashkëpunim me FFK-në do të organizojë seminar njëditor për trajnerë të portierëve, i cili do të mbahet të martën, më 15 prill, nga ora 8:45-12:00 dhe 13:30- 17:00 në Kampin Nacional Edukativ në Hajvali.

Ligjërues në këtë seminar do të jetë instruktori i portierëve nga Gjermania, Frank Thieltges.
Në këtë seminar do të ketë punë teorike dhe praktike rreth portierëve të moshave të reja si dhe atyre senior/profesional.
Trajnerët e interesuar duhet të konfirmojnë pjesëmarrjen në emailin e më poshtëm:
email: departamentiteknik@ffk-kosova.com
Orët mësimore në këtë seminar do të njihen si – mësim i vazhdueshëm (CPD) nga Departamenti i Edukimit në FFK në përputhje me Konventën e trajnerëve për vazhdimin e licencave.

Edon Zhegrova do të largohet nga Lille në verë, megjithatë ende nuk dihet se ku do ta vazhdoj karrierën.

Gazeta katalonase SPORT raporton se Edon Zhegrova është vendosur fort në radarin e Barcelonës këtë verë, pasi klubi e ka monitoruar nga afër sulmuesin e talentuar.

Reprezentuesi kosovar, që aktualisht luan për Lille, është gati të largohet nga klubi francez pasi i ka informuar se nuk do të rinovojë kontratën e tij, e cila skadon në vitin 2026.

Skautët e Barcelonës kanë qenë veçanërisht të fokusuar te Zhegrova, të impresionuar nga paraqitjet e tij këtë sezon, veçanërisht në Ligën e Kampionëve, ku luajti role kyçe në fitoret ndaj Real Madrid dhe Atletico Madrid.

Zhegrova, i njohur për aftësitë e tij në driblim, aftësinë për të shënuar dhe shkathtësi në krahun e djathtë, ka shprehur prej kohësh admirimin e tij për Barcelonën.

Talenti i tij e ka bërë atë një nga lojtarët më të spikatur të sezonit dhe Barcelona e sheh atë si një shtesë të mundshme për të forcuar sulmin e tyre.

Ndërsa klubi është i vetëdijshëm për aftësitë e tij, ata nuk kanë bërë ende një lëvizje zyrtare, pavarësisht përfshirjes së tij në raportet e tyre të skautizmit së bashku me shokët e skuadrës së Lille si portieri Lucas Chevalier dhe sulmuesi Jonathan David. Lille, i cili nënshkroi Zhegrovën për pak më shumë se 7 milionë euro në 2021, po kërkon mbi 30 milionë euro për anësorin, por ata mund të jenë të gatshëm të negociojnë për të shmangur humbjen e tij falas kur kontrata e tij të përfundojë në 2026.

Megjithëse Napoli ka shprehur interes dhe është takuar me përfaqësuesit e tij, Barcelona mbetet destinacioni i preferuar i lojtarit, por një marrëveshje ende nuk është realizuar.

Menaxheri i Kombëtares së Kosovës, Bajram Shala ka fajësuar agjentët e lojtarëve kur këta të fundit zgjedhin se cilën kombëtare të përfaqësojnë.

Në një intervistë për KosovaPress, Shala ka komentuar zgjedhjen e Etnik Brrutit të Malishevës për kombëtaren shqiptare, vendim ky që u cilësua edhe si ‘tradhti’ nga qarqe të afërta me Federatën e Futbollit të Kosovës.

“I kemi shterrur të gjitha mundësitë. E kemi siguruar se është pjesë e Kombëtares.

Vendimet individuale të futbollistëve, të keni të qartë, merren në bazë të interesave personale të cilit do çoftë futbollist. Asnjë futbollisti asnjëherë nuk i është mbyllur dera e prezantimin të Kosovës, as edhe njërit, të gjithëve iu është ofruar kjo mundësi, por pastaj futbollistë të ndryshëm kanë bërë zgjedhje të ndryshme për arsye dhe interesa të ndryshme puro personale dhe kjo është diçka që nuk diskutohet në asnjë formë”, theksoi Shala.

Ai shton se janë agjentët e lojtarëve që në shumë raste bëjnë pazare me lojtarët dhe kjo “është arsyeja pse Federata e Futbollit nuk dëshiron të kontaktojë me ta”.

Largimin e Brrutit Shala thotë se provuan ta ndalin përmes kontakteve direkte me lojtarin.

Kryetari i Federatës së Futbollit të Kosovës, Agim Ademi, ka uruar fitër Bajramin.

“Të nderuar qytetarë të Republikës së Kosovës dhe bashkatdhetarë të besimit islam!

I nderuar komunitet i futbollit, Me përfundimin e muajit të madhëruar të Ramazanit, kam kënaqësinë që sot, në emër të Federatës së Futbollit të Kosovës dhe në emrin tim personal t’ju përcjell urimet më të mira për festën e Fitër Bajramit për Ju dhe Familjet tuaja.

Kjo festë është moment reflektimi dhe mirënjohjeje, një mundësi për të forcuar lidhjet familjare dhe për të ndarë të mirat me ata që kanë nevojë.

Në këtë festë le të kultivojmë vlerat e dashurisë, respektit dhe harmonisë në shoqërinë tonë, duke kontribuar për një të ardhme më të ndritur për të gjithë.

Me dëshirën që Zoti t’ua ketë pranuar agjërimin, lutjet dhe veprat e mira gjatë këtij muaji të bekuar, në emrin tim dhe të Komitetit Ekzekutiv të FFK-së, ju uroj nga zemra Fitër Bajramin.

Shëndeti, begatia dhe lumturia qofshin me Ju dhe Familjet tuaja!

Urime e me fat Fitër Bajrami!”, ka uruar Ademi.