Drita ka fituar ndaj Gjilanit me rezultat të thellë 4-0 ndeshjen e vlefshme për javën e 26-të në Albi Mall Superligën e Kosovës.

Ekipi i Zekirija Ramadanit i është kthyer fitores në kampionat pas barazimit me Dukagjinin, duke mposhtur rivalët e mëdhenj lokal, Gjilanin, pa asnjë vështirësi.

Pjesa e parë e ndeshjes u karakterizua me dominim të bardhekaltërve, të cilët përveç rasteve arritën të shënojnë edhe katër golat.

Goli i parë i ndeshjes erdhi pas vetëm 12 minutave lojë me anë të Almir Ajzerajt, i cili shënoi për 1-0, ndërsa në minutën e 17-të ishte Rron Broja që shënoi për 2-0.

Në minutën e 24-të erdhi edhe goli i tretë me anë të Arb Manaj, i cili shënoi për 3-0, teksa ukrainasi Denys Kostyshyn (42’) dërgoi ekipet në pushim me rezultat 4-0.

Në pjesën e dytë, nuk pati shumë histori, pasi Drita e menaxhoi mirë lojën, Gjilani nuk pati shumë raste dhe portat mbeten të paprekura.

Në fakt, vendasit e gjeten e golin në minutën e fundit me anë të Albert Dabiqajt, por VAR-i e anuloi për një prekje të topit me dorë dhe ndeshja u mbyll me rezultat 4-0.

Pas kësaj fitore, Drita e sheh veten në pozitën e parë me 57 pikë apo 42 më shumë se Ballkani i dyti, ndërsa Gjilani renditet i pesti me 35 pikë.

Në ndeshjen e ardhshme, Drita udhëton te Feronikeli ’74, teksa Gjilani e pret në shtëpi Ferizajn.

Futbolli kosovar po kalon një periudhë zhvillimi dhe konsolidimi, e ku sukseset nuk janë thjesht rastësore, por rezultat i një pune të palodhshme dhe strategjike. Në krye të këtij transformimi pa dyshim qëndron Agim Ademi, presidenti i FFK-së, i cili ka ditur të sfidojë pengesat dhe të drejtojë futbollin tonë drejt një të ardhmeje të ndritur. Përkundër sfidave të shumta, ai ka dëshmuar që vendosmëria dhe vizioni janë çelësi i suksesit.

Pa dyshim ngritja e Kosovës nga Liga C në Ligën B të Ligës së Kombeve është njëra nga arritjet më të spikatura gjatë udhëheqjes së tij, por jo e vetmja. Kur e mori drejtimin e FFK-së, Kosova ishte në Ligën D dhe tani ka bërë një arritje historike, duke qenë në mesin e 32 ekipeve më të mira të Evropës.

Ky sukses nuk ishte i rastësishëm, por produkt i një strategjie të mirëmenduar dhe angazhimit të vazhdueshëm. Ademi nuk u ndal para sfidave, sidomos para atyre që vinin nga qarqe të caktuara jo sportive dhe grupe interesi. Ai u përball me shantazhe dhe padi të ndryshme, por asnjëherë nuk e humbi fokusin tek zhvillimi i futbollit. Arriti ta ruaj besimin e komunitetit të futbollit dhe u angazhua maksimalisht për të mbrojtur federatën dhe zhvillimin e saj.

Vendimi për të sjellë Franco Foda-n në krye të Kombëtares pas Alain Giressit ishte një lëvizje strategjike që tregoi vizionin e Ademit. Me një trajner të ri dhe me afrimin e një grupi lojtarësh të rinj u rrit konkurrenca dhe u vendosen objektiva të qarta. Kalimi në Ligën B është njëri prej tyre dhe tashmë synimi është që Kosova të vazhdojë të ngjitet edhe më lart, duke u kualifikuar në të ardhmen në turne të mëdha si Kampionati Evropian dhe Kupa e Botës.

Përveç suksesit sportiv, presidenti i FFK-së ka dhënë një kontribut të jashtëzakonshëm në përmirësimin e infrastrukturës së futbollit. Ndërsa media shpesh fokusohet tek konfliktet dhe polemikat, puna konkrete që është bërë për fushat e futbollit dhe mbështetja ndaj klubeve ka ndikuar drejtpërdrejtë në rritjen e cilësisë së futbollit kosovar. Klubet dhe komuniteti i futbollit e ndjejnë ndryshimin, pavarësisht se një pjesë e mediave dhe individëve vazhdon të mbetet e ndikuar nga interesa të caktuara. Në fund, sado që dikush mund të ketë inate personale apo ambicie për të udhëhequr FFK-në, faktet flasin vetë; Agim Ademi dhe Federata e Futbollit të Kosovës janë në rrugën e duhur, duke krijuar një themel të fortë për të ardhmen e futbollit në Kosovë. Futbolli nuk ka nevojë për polemika, por për vizion, punë dhe vendosmëri. Dhe përderisa ky vizion vazhdon të zbatohet, e ardhmja e futbollit kosovar duket premtuese.

Kombëtarja e Kosovës ka shënuar fitore 3:1 ndaj Islandës në ndeshjen e kthimit të play-offit të UEFA Nations League.

Vendasit kaluan të parët në epërsi në minutën e 2’të me anë të Oskarssonin.

Por, reagimi ishte mjaftë i shpejt nga “Dardanët” ku në pjesën e parë shënuan dy herë.

Fillimisht në minutën e 35’të, Vedat Muriqi barazoi shifrat në 1:1 dhe më pas në minutën e 45’të shënoi për 2:1.

Në pjesën e dytë, sulmuesi i Mallorcas kompletoi hat-trikun duke shënuar për 3:1 në minutën e 79’të.

Kosova pas kësaj fitoreje siguron Ligën B të UEFA Nations League, ku pritet të ketë kundërshtarë më të fortë sesa në Ligën C.

Kombëtarja e Kosovës do të zhvilloj sot (e diel) ndeshjen e kthimit ndaj Islandës në kuadër të ‘Play-Off’-it të Ligës së Kombeve.

Në sfidën e zhvilluar në Prishtinë të enjten mbrëma, Dardanët triumfuan me rezultat 2-1.

Lumbardh Dellova dhe Elvis Rexhbecaj realizuan për Dardanët, derisa kapiteni Oskarson për Vikingët.

Sfida e sotme zhvillohet në Murcia të Spanjës me fillim nga ora 18:00.

Vendasve iu nevojitet fitorja me dy gola epërsi për të kaluar tutje, në anën tjetër Kosovës i mjafton edhe një barazim për të kaluar në Ligën B të Ligës së Kombeve.

Përveç Edon Zhegrovës që nuk u grumbullua fare shkaku i lëndimit, nga grumbullimi pas ndeshjes së parë janë larguar edhe Aro Muric e Donat Rrudhani shkaku i lëndimeve, derisa Valon Berisha mungon për shkak të kartonëve.

Kombëtarja e Kosovës do të përballet nesër me Islandën në qytetin e Murcias në Spanjë, në ndeshjen vendimtare të play-offit për Ligën B të Ligës së Kombeve.

“Dardanët” kanë një epërsi të lehtë pas fitores 2:1 në ndeshjen e parë në Prishtinë, por sfida në terren neutral pritet të jetë e ashpër dhe e paparashikueshme.

Sulmuesi i Kosovës, Vedat Muriqi, ka theksuar se skuadra do të luftojë deri në fund, pavarësisht mungesave të disa lojtarëve kyç.

“Shpirti ynë luftarak është gjëja më e rëndësishme te ne. E kemi treguar këtë disa herë. Edhe pse kemi mungesa, kushdo që do t’i zëvendësojë ata e di që do të jap maksimumin”, u shpreh sulmuesi kryesor i Kosovës.

Nga ana tjetër, trajneri Franco Foda pret një duel të barabartë, duke vlerësuar cilësitë e kundërshtarit.

“Do të jetë një përballje 50/50. Islanda ka disa futbollistë të mirë, sidomos në fazën ofansive. Ndonëse po e zhvillojmë ndeshjen si mysafirë, do të luajmë lojën tonë, të krijojmë raste dhe të provojmë të shënojmë gola”, deklaroi strategu gjerman.

Me Kosovën që kërkon të konfirmojë pozitën e saj në Ligën B dhe Islandën që synon të rikthehet me një përmbysje, përballja e nesërme pritet të jetë dramatike.

Një fitore ose barazim do t’ia siguronte “Dardanëve” suksesin e madh dhe kualifikimin në Ligën B.

Kombëtarja e Kosovës ka mbërritur dje në qytetin Murcia të Spanjës, për ndeshjen kthyese ndaj Islandës në play-offin e UEFA Nations League.

Federata e Futbollit të Kosovës sot ka publikuar disa foto nga shëtitja e ekipit në rrugët e qytetit të Murcias.

“Të bashkuar ecim drejt suksesit!”, shkruhet në mbishkrimin e publikuar nga FFK.

Kombëtarja e Kosovës në futboll synon që përmes ndeshjeve të play-off-it të ngrihet në Ligën B të Ligës së Kombeve.

Për ta arritur këtë objektiv, Dardanët duhet të tregohen më të suksesshëm se Islanda në dy ndeshjet që do të zhvillohen mes tyre brenda tri ditëve.

Dueli i parë zhvillohet sonte në “Fadil Vokrri” në Prishtinë me fillim nga ora 20:45 dhe para ndeshjes, trajneri Franco Foda në konferencë për media të zhvilluar dje bëri të ditur se mesfushori Valon Berisha dhe mbrojtësi Amir Rrahmani janë ende duke u rikuperuar nga lëndimet, andaj paraqitja e tyre sonte është në dyshim

Trajneri i dardanëve theksoi se nga lojtarët do të kërkojë që të bëhet presion ndaj Islandës që nga minuta e parë e ndeshjes.