Suhareka ka marrë fitoren e parë në stinorin pranveror, pasi ka mposhtur Feronikelin ’74 me rezultat të ngushtë 2-1.

Vendasit kaluan shpejt në epërsi, kur në minutën e 17 gjetën golin e parë në ndeshje.

Ishte Fitim Susuri që asistoi për mrekulli te Eneid Kodra i cili realizoi për 1-0.

Përkundër golit të hershëm, pjesa e parë u mbyll me epërsinë minimale të skuadrës vendase 1-0.

Edhe në pjesën e dytë vendasit gjetën golin të parët, kur kësaj radhe Hysen Memolla asistoi bukur për Liridon Fetahajn i cili shënoi për 2-0.

Mysafirët u rikthyen në lojë në minutën e 78-të, me kapitenin Lavdim Zumberi që realizoi gol të bukur nga distanca për 2-1.

Deri në fund përkundër përpjekjeve të mysafirëve për golin e barazimit një gjë e tillë nuk ndodhi dhe Suhareka mori fitoren e parë në stinorin pranveror 2-1.

Në Prishtinë u mbajt mbledhja e Komitetit HatTrick të UEFA-s. Gjatë kësaj mbledhjeje janë diskutuar dhe miratuar 22 projekte nga 22 federata evropiane.

Në këtë mbledhje u miratua projekti i FFK-së, i cili do ta shndërrojë Kampin Nacional të FFK-së në Hajvali në një stadium të kategorisë së katërt.

FFK ka siguruar mbështetje financiare për vendosjen e 14,000 ulëseve në këtë stadium, si faza e fundit e kompletimit të Shtëpisë së Kombëtares së Kosovës.

46
Mirel Josa nuk është më trajner i KF Vëllaznimit.

Klubi gjakovar ka njoftuar përmes faqes së vetë zyrtare se e ka ndërprerë bashkëpunimin me trajnerin shqiptar, shkruan “Gazeta Express”.

“KF Vëllaznimi dhe kryetrajneri Mirel Josa, sot kanë arritur marrëveshje të dy anshme për shkëputjen e bashkëpunimi. KF Vëllaznimi e falenderon kryetrajnerin Josa për bashkëpunimin dhe punën e deritanishme dhe i uron sukses në të ardhmen. Mbi të gjitha është Vëllaznimi”, njoftojnë Kuqezinjtë.

Ish-trajnerit të Prishtinës nuk i ecën punët mirë me rezultate në Gjakovë dhe kjo ishte arsyeja e ndarjes mes palëve.

Vëllaznimi synon të rikthehet në Superligë, por në javët e fundit ka ngecur prapa në Grupin A të Ligës së Parë pas rezultateve zhgënnyese.

Shkruan: Driton Latifi

Në çdo komunikim vënia e theksit të duhur në shprehje gjithmonë transmeton mesazhe shtesë në të folur dhe jeta është mësimi më i vështirë, por edhe më i mirë kur përjeton eksperiencën para mësimit gjithmonë.

Motoja se çdo shqiptar është i mirëpritur të luaj për kombëtaren kuqezi ka domethënie të madhe dhe të qëndrueshme, por mbrapa saj ka një hile si në rastin Brruti dhe nja 13 raste të tjera kur janë marë lojtarët direkt nga ekipet e Kosovës, duke keqpërdorur pozitën e tyre momentale në karrierë, pakënaqësinë me selektim, planifikimin në karrierë, ka dëmtuar direkt Kosovën dhe përfaqësimin e saj ndërkombëtar. Realisht D-ja, si atdhetar që tenton të jetë, është dashur të modifikojë thënien duke potencuar se në këtë kohë çdo Shqiptar duhet të luaj edhe për Kosovën sepse ajo ka nevojë për secilin, por lakmia e produktit të gatshëm për sukses nuk e lë të shprehet kështu, sepse pa këta lojtar nga Kosova mund të harrojë evropianin e parë e të dytë.

Nuk kemi arrit deri këtu duke dëmtu njëri-tjetrin, por duke ndihmu, duke nda shtëpinë, bukën e kripën… me vlera që na kanë transmetuar etërit tanë.

Sipas tij ne ndoshta edhe nuk jemi shqiptarë, sjemi as shqiptarë të Kosovës, por thjeshtë kosovar – term ndarës në aspektin figurativ dhe që krijon distancë në të shprehur. Dhe këtë e përdor koxha mirë pa e thënë direkt, por e transmeton mirë me moton e tij.
Fati i mbetjes së shqiptarëve jashtë kufijve aktual, nuk është faji i jonë!

Jam dakord deri diku që gara të zhvillohet nëpër Evropë për talente, sepse ka edhe një sens konkurrence si duam ta quajmë rivalitet për prestigj apo “ekonomi tregu”, por jo me skaut-agjenta nga Tirana që përfshihen tinëz në kampet modeste të Kosovës nëpër vende evropiane.

Ai madje e relativizon aq shumë Kosovën dhe futbollistët e saj, duke i krahasuar me ata që patën fatin e imponuar të emigrimit familjar si Xhaka, por harron se vëllai tij ishte trimi i Beogradit më 2014, me të cilët ai tani fërkon duart e interesit të fondeve evropiane!

Paralajmërimi edhe më i madh vjen se D-ja duke organizuar Euro2027 për U-21 ka të siguruar kualifikimin si bashkënikoqir, dhe këtë do ta shfrytëzojë koxha mirë si tregtar që është, për të mbledhur sa më shumë futbollist të ekipeve të Kosovës, duke lajmëruar se ky i fundit është vetëm i pari nga ekzodi masiv që ai planifikon nga zbrazja e “Marketit Kosova” duke aluduar te tri përfaqësueset asete të Kosovës U-17, U-19 dhe U-21.

Dhe, Federata e futbollit të Kosovën bën gabimin më të madh që nuk raporton me dokumentim të çdo rasti dëmin që po i bëhet, jo në UEFA, por në FIFA aty ku vendoset për rregulla të ndërrimit të shtetësisë së lojtarëve, sepse në UEFA ai ka ruajtur gjithë influencën vetëm për vete dhe asnjëherë për Kosovën, madje nuk e ngriti as çështjen e flamurit serb me hartë të Kosovës, sepse do të prish kumarinë dhe lidhjen me Lakoviçin në Nyon.

Postin e nënkryetarit mos harro e ke dhuratë nga votat dhe influenca e Kosovës e Maqedonisë, asaj të parës që shihet se sa i ndihmon!

Dhe kam një pyetje, që nuk e thashë kurrë publikisht deri tash…
Si është e mundur që në mbi 30 vite të fundit shërbim për kombëtaren shqiptare të mos jetë asnjë, pra asnjë i vetëm ish-lojtar nga Kosova trajner në ndonjë ekip grupmoshe kuqezi, madje as ndihmës trajner i tyre? Të mos flasim për ndonjë post në FShF! Apo futbollistët nga Kosova janë të mirë vetëm për punë argati…!

Shqipëria është shumë e madhe dhe ska nevojë për këtë qasje abuzive të grykësit të pangopur. Basti që ai ka vënë nuk është i Shqipërisë dhe as i shqiptarëve, por ego personale.
Shqipërisë ia kanë dhënë gjithmonë hakun djemtë e Kosovës, por është koha të kemi edhe ne gëzimin e hidhërimin tonë.

Mos harroni, Kosova po bëhet, kështu si po e sakatojnë disa me dije e pa vetdije dhe do të kualifikohet në një ngjarje të madhe, dëshën apo nuk deshën disa andej e këndej kufirit!

(Shkrimi paraqet bindjen personale të aktualitetit të fundit të futbollit)

Dy ndeshje tejet interesante të javës së 24-të në Superligën e Kosovës në futboll zhvillohen sot.

Prishtina e pret në Hajvali skuadrën e Ismet Munishit, Dukagjinin.

Gjyqtari kryesor në këtë duel që nis nga ora 12:30 është Kujtim Krasniqi.

Takim tejet interesant është edhe ai mes Gjilanit dhe Malishevës, dy skuadrat po luftojnë të zënë një vend në tabelë që dërgon në garat e UEFA-s.

Takimi mes Malishevës dhe Gjilanit zhvillohet nga ora 14:00 në stadiumin “Liman Gegaj”, kurse gjyqtar është Mentor Ajeti.

Presidenti i Federatës së Futbollit, Armand Duka, ishte i ftuari i parë në “Nazarko Podcast”, një format i ri që sapo ka nisur, nën moderimin e Mentor Nazarkos dhe Oneda Skënderit.

Gjatë bisedës, Presidenti Duka foli për rrugëtimin e tij në krye të Federatës, rritjen e institucionit, rolin e tij në UEFA dhe ndryshimet që kanë ndodhur në futbollin shqiptar.

Megjithatë, fokusi jonë ishte te marrëdhëniet e tij me Federatën e Futbollit të Kosovës (FFK), kalimin e lojtarëve nga Kosova te Shqipëria si dhe rastin e fundit “Etnik Brruti”.

Kalimi i lojtarëve nga Kosova te Shqipëria (rasti i Brrutit) – Pashë një status të babait të lojtarit dhe mendoj që ishte i duhuri. Akuza për mua apo FSHF-në ka në të dyja drejtimet, pse e keni marrë këtë lojtar apo pse nuk e keni marrë. Edhe kur i merr, edhe kur nuk i merr, gjysma e njerëzve janë pro dhe gjysma kundër. Nëse je i bindur që ke bërë më të mirën, duhet të vazhdosh ta bësh. A e kam marrë unë Brrutin? Unë jam një nga ata që vendos për politikat e FSHF-së dhe një nga politikat tona është që dera e Kombëtares është e hapur për këdo. Ne marrim vetëm futbollistët shqiptarë, kushdo që ndihet shqiptar luan për ne.!

Marrëdhënia me FFK? – Kam marrëdhënie të mira me të gjitha federatat e Evropës, kurse me Federatën e Kosovës kam marrëdhënie vëllazërore.

Etnik Brruti – Në këndvështrimin sportiv, të gjithë ata që janë mbështetës të përfaqësueses së Kosovës mund të kenë një lloj të drejte, nëse futbollisti është një talent që mund të kishte kontribuar për ekipin që ata mbështesin. Në këtë këndvështrim kanë të drejtë. Në këndvështrimet e tjera nuk kanë të drejtë, sepse kushdo vendos vetë për veten. Nuk kemi pse mërzitemi, ne jemi bërë krenarë që Xhaka luan me Zvicrën, tani mërzitemi se pse Brruti luan me Shqipërinë. Brruti e ka marrë pasaportën dhe kemi aplikuar dhe për vizën angleze dhe uroj ta kemi në kohë.

Reagimi i trajnerit të U-21 të Kosovës – Nuk besoj se ka futbollistë që e kanë ëndërr të shkojnë në Rusi, po pa dyshim që nuk mund ta refuzojë një klub rus. Futbollistët kanë ëndërr të shkojnë në perëndim, në Angli, Gjermani, Itali, Spanjë, Spanjë. Por nëse karriera i çon në Rusi, mund të luajnë dhe aty. Nuk është ai qëllimi, qëllimi i djalit është që i ka pëlqyer të luajë me Shqipërinë. Ka dhe një shans të madh, ne do jemi pjesë e Kampionatit Europian U-21 2027. Nëse vazhdon karrierën mirë, do të luajë në finalet e këtij kampionati, në karrierë nuk të jepet shumë mundësia kur luan me ekipe relativisht të mesme apo të vogla. Çfarë i ofron Brruti Silvinjos? Teknikisht nuk e njoh, vendosin trajnerët, drejtori teknik i FSHF-së. Nuk e kam parë ndonjëherë. Nuk kam formimin e duhur për ta njohur teknikisht. /FSHF/

Federata Shqiptare e Futbollit ka vazhduar peshkimin tek Kosova për rrëmbimin e talenteve. Ani pse ata të zhvilluar te Kosova, kombëtarja kuqezi nuk tregon shumë respekt për FFK dhe po i bën oferta dardanëve.

Pasi ditë më parë mori kapitenin e skuadrës së Kosovës U21, Etnik Brruti, gjë e cila hapi shumë polemika, FSHF i ka vuri syrin një tjetër talenti të madh.

Fjala është për yllin e Prishtinës dhe skuadrës së Kosovës U21, Dion Gallapeni.

Kontaktet mes Gallapenit dhe FSHF-së, janë vu, por siç mëson ekskluzivisht Ballkani.info, ylli dardan i ka thënë jo kësaj oferte dhe vazhdon të mbetet tek Kosova.

Ferizaj ka fituar me rezultat të ngushtë 2-1 përballjen ndaj Llapit, të vlefshme për javën e 24-të të Albi Mall Superligës së Kosovës.

Ferizaj ka marrë tri pikë shumë të mëdha në shtëpi duke u distancuar momentalisht nga zona e rrezikshme.

Pjesa e parë e ndeshjes u karakterizua me lojë të hapur dhe raste nga të dyja skuadrat, ku u shënuan edhe dy gola.

Goli i parë i ndeshjes u shënua pas 11-të minutave lojë me anë të Valmir Nafiut, i cili shënoi për epërsinë 1-0, ndërsa Blendi Baftiu (17’) barazoi shifrat në 1-1.

Megjithatë, Antonio Ilieski (42’) u përkujdes për golin e dytë duke dërguar Ferizajn në pushim me epërsi 2-1.

Në pjesën e dytë, u zhvillua lojë më e mbyllur, por më e ashpër dhe hera herës me tensione.

Pas 45 minutave të dytë nuk pati gol dhe Ferizaj mori në fund tri pikë të vlefshme pas një fitore 2-1.

Pas kësaj fitore, Ferizaj e sheh veten në pozitën e pestë me 32 pikë, ndërsa Llapi renditet i teti me 26 pikë.

Në ndeshjen e ardhshme, ferizajasit luajnë në udhëtim te Ballkani, teksa llapjanët e presin Suharekën.

Drita ka shënuar fitore me rezultat 2-0 në shtëpi ndaj Ballkanit në kuadër të javës së 24-të në elitën e futbollit kosovar.

Pjesa e parë u zhvillua kryesisht me duele në mesfushë, por pa prodhuar në ndonjë rast aksion të rrezikshëm për gol.

Gjërat për Ballkanin u vështirësuan në pjesën e dytë kur në minutën e 64-të mbetën me një lojtar më pak në fushë pas përjashtimit të Gentrit Halilit.

Pas këtij momenti Drita e shfrytëzoi avantazhin numerik në fushë, duke filluar sulmet në drejtim të portës së Ballkanit.

Po luhej minuta e 77-të e takimit kur Veton Tusha bëri një gjuajtje e cila kaloi nëpërmjet një grumbulli lojtarësh dhe në fund përfundoi në portë për 1-0.

Për të vulosur përfundimisht fitoren e Dritës u përkujdes Kastriot Selmani i cili në minutën e 89-të për rezultatin 2-0.

Pas kësaj fitoreje Drita shkon në kuotën e 53 pikëve të grumbulluara, ndërsa Ballkani numëron 38 sosh.

Presidenti i Federatës së Futbollit të Kosovës, Agim Ademi, ka pritur sot në Prishtinë presidentin e Federatës së Futbollit të Polonisë, Cezary Kulesza, dhe sekretarin e kësaj federate, Łukasz Wachowski, në një vizitë të rëndësishme për zhvillimin e marrëdhënieve mes dy federatave.

Nëpërmjet një postimi në rrjetet sociale, presidenti Ademi theksoi rëndësinë e bashkëpunimit me Federatën Polake të Futbollit dhe ndarjen e përvojave të vlefshme, veçanërisht në segmentin e zhvillimit të futbollit të grupmoshave të reja dhe arbitrimit.

“Sot pata kënaqësinë të prisja presidentin e Federatës së Futbollit të Polonisë, Cezary Kulesza, dhe sekretarin e kësaj federate, Łukasz Wachowski, në një vizitë të rëndësishme në Prishtinë. Diskutuam për mundësitë e bashkëpunimit mes dy federatave dhe për ndarjen e përvojave të vlefshme për zhvillimin e futbollit, veçanërisht në nivelin e grupmoshave të reja,” shkroi Ademi.

Një nga temat kryesore të diskutimit ishte përvoja e Polonisë në avancimin e sistemit të arbitrimit, i cili është ndër më të zhvilluarit në Evropë dhe ka ndikim të madh edhe në nivelin botëror. Ademi potencoi se suksesi i gjyqtarëve polakë mund të shërbejë si një model i rëndësishëm për arbitrimin në Kosovë.

Po ashtu, në këtë takim u diskutua edhe për realizimin e projekteve të përbashkëta, të cilat do të përqendrohen në zhvillimin e futbollit dhe mbështetjen për talentet e rinj. “Këto projekte do të krijojnë mundësi për futbollistët e rinj të rriten e të zhvillohen dhe njëherësh do të forcojnë bashkëpunimin dhe miqësinë mes dy vendeve tona,” theksoi presidenti i FFK-së.