Në edicionin e fundit të FFK Podcast, Thierry Favre, drejtor i programit HatTrick dhe drejtor i zhvillimit të federatave kombëtare në UEFA, foli për kontributin e presidentit të Federatës së Futbollit të Kosovës, Agim Ademi dhe pritjen që delegacionet ndërkombëtare marrin në Kosovë.

“Presidenti juaj Agim Ademi është shumë i vlerësuar në UEFA dhe federata të tjera. Ai vlerësohet shumë, është shumë aktiv dhe gjithmonë i mikpritës. Ai i mirëpret të gjitha delegacionet dhe kjo është një pikë shumë e rëndësishme për imazhin e federatës”, tha Favre.

Ai shtoi se këtë përshtypje e kishte marrë edhe gjatë mbledhjes së Komitetit HatTrick në mars, ku të gjithë pjesëmarrësit ishin të magjepsur nga mikpritja, shërbimi i jashtëzakonshëm i ofruar dhe puna e bërë në terren nga FFK

Gjithashtu, ai përmendi ndeshjet që Kosova i zhvilloi në shtëpi kundër Anglisë dhe Ishujve Faroe, në të cilat ai ishte i pranishëm, e ku tha se anglezët ishin fillimisht të rezervuar për shkak të disa incidenteve në Bullgari dhe Malin e Zi, por u ndjenë të mirëpritur dhe të sigurt gjatë qëndrimit në Kosovë.

UEFA ka zyrtarizuar sot oraret e ndeshjeve të “play-off”-eve për kualifikueset e Botërorit 2026, ku Shqipëria do të luajë një nga ndeshjet më të rëndësishme të viteve të fundit.

Kuqezinjtë do të përballen si mysafir me Poloninë, në orën 20:45, ndërsa stadiumi i këtij takimi pritet të bëhet i ditur në ditët në vijim.

Nëse Shqipëria siguron kalimin e kësaj sfide të vështirë, atëherë në finale do të përballet me fituesin e çiftit Ukrainë–Suedi.

Po ashtu, në të njëjtën orë do të zbresë në fushë edhe Kosova, e cila do të luajë jashtë fushe si mysafir ndaj Sllovakisë.

Orari i plotë i gjysmëfinaleve të “play-off”-eve (26 mars 2026):

Nga ora 18:00

Turqi – Rumani

Nga ora 20:45

Itali – Irlanda e Veriut

Uells – Bosnjë-Hercegovinë

Ukrainë – Suedi

Poloni – Shqipëri

Sllovaki – Kosovë

Danimarkë – Maqedoni e Veriut

Republika Çeke – Irlandë

Ndeshjet finale do të luhen më 31 mars, të gjitha në orën 20:45, ku do të vendosen edhe ekipet e fundit europiane që do të sigurojnë biletën për Botërorin 2026.

Në mbrëmjen e së shtunës në Gjenevë, FC Kosova po nga i njëjti vend, organizoi mbrëmjen me afaristë dhe sponsorët e Klubit në një darkë falënderuese ku në mesin e tyre kishte figura të ndryshme nga komuniteti shqiptar që jetojnë dhe veprojnë në këtë kanton. Të ftuar ishin mbështetësit ( Sponsorët ) e Klubit të Futbollit FC Kosova nga Gjeneva të cilët me vite kontribuojnë. Po ashtu të ftuarit nga jeta diplomatike ishin në mesin e tyre si ajo nga Konsullata e Republikës së Kosovës ne Gjenevë, deputet Zviceran të kantonit dhe kryesia e UKSHFZ.

Në fjalën hyrëse kryetari i FC Kosova nga Gjeneva z. Fisnik Buçi i falënderoi të gjithë pjesëmarrësit në këtë mbrëmje duke falënderuar të gjithë pjesëmarrësit dhe mbështetësit e Klubit dhe në veçanti falënderoi UNIONIN UKSHFZ dhe Kryetarin e FFK z. Agim Ademin dhe Kryetarin e UKSHFZ z. Feti Demolin të cilët organizuan fanellën e kombëtares me nënshkrime të futbollistëve që në këtë mbrëmje ishte dhuratë për FC Kosovën e Gjenevës të e shesë në ankand për buxhetin e klubit.

Në këtë mbrëmje kishte edhe fanella të tjera nga yjet e futbollit shqiptar që mbrojnë ngjyrat e kombëtares së Zvicrës si ajo e Granit Xhakës dhe disa të tjerëve të cilët u shitën mes 2 mijë dhe 5 mijë Franga Zvicerane dhe blerësit ishin afaristë të ndryshëm të kantonit të Gjenevës.

Qershia mbi tortë dhe ankandi i fundit i mbrëmjes ishte ajo e Kombëtares së Kosovës e cila filloi në shitje me një çmim nga 5 mijë franga e që pas disa tentimeve nga të tjerët në fund, me një çmim rekord e bleu afaristi nga Gjeneva z. Reshat Selmni.

Ishte një mbrëmje shumë gazmore për të gjithë të pranishmit në sallë të cilët ishin kishin ardhur edhe me familje të cilët gjatë mbrëmjes vallëzuan dhe u çmallën me muzikën shqiptare nën tingujt dhe këngët e ENERGY BAND të organizuar nga kryesia e FC Kosova Gjenevë.

Federata e Futbollit e Kosovës (FFK) ka zyrtarizuar marrëveshjen e re me përzgjedhësin e ekipit kombëtar, Franco Foda, duke konfirmuar vazhdimin e bashkëpunimit edhe për dy vite të tjera.

Kontrata, e cila vulos qëndrimin e Fodas në krye të Kombëtares së Kosovës deri në fund të vitit 2027, u nënshkrua nga presidenti i FFK-së, Agim Ademi, dhe vetë përzgjedhësi Franco Foda më 6 tetor, në ditën e parë të grumbullimit të ekipit kombëtar për ndeshjet e muajit tetor.

Sipas marrëveshjes, kontrata e Fodas parashikon vazhdim automatik në rast të kualifikimit në Kampionatin Evropian 2028, duke garantuar stabilitet dhe kontinuitet në udhëheqjen e përfaqësueses.

Franco Foda mori drejtimin e ekipit më 17 shkurt 2024 dhe deri më tani ka udhëhequr Kosovën në 17 ndeshje, duke regjistruar 11 fitore, 2 barazime (përfshirë atë ndaj Rumanisë 0:0) dhe 4 humbje.

Ky bilanc e rendit Fodën ndër përzgjedhësit më të suksesshëm në historinë e përfaqësueses së Kosovës, ndërsa FFK shpreson që me vazhdimin e tij, Kombëtarja të arrijë objektivin madhor – kualifikimin historik në Evropianin 2028.

Presidenti i FIFA-s, Gianni Infantino, gjatë intervistës ekskluzive për FFK Podcast foli edhe për lidershipin e presidentit të FFK-së, Agim Ademi, dhe ndikimin e programeve të FIFA-s dhe UEFA-s në zhvillimin e futbollit kosovar.

“Unë kam marrëdhënie shumë të mira me Agim Ademin. E përgëzoj për emërimin e tij për herë të parë si anëtar i Komitetit të Marrëdhënieve Institucionale të FIFA-s. E njoh prej shumë vitesh dhe e di mirë se çfarë po bën për futbollin. Ai po bën shumë, në një mjedis që nuk është gjithmonë i lehtë, le ta pranojmë. Por, ai e ka zemrën në vendin e duhur, vërtet. Ai e bën punën e tij bashkë me ekipin me shumë pasion. Ai di të prekë ndjenjat e duhura, emocionet e duhura dhe shpirtin e shumë lojtarëve”, tha numri 1 i FIFA-s.

Infantino gjithashtu nënvizoi ndikimin e presidentit Ademi dhe të FFK-së në integrimin e futbollistëve kosovarë që kanë lindur jashtë vendit:

“Fola me të edhe më herët sot për këtë dukuri, për shumë lojtarë nga Kosova që kanë lindur dhe janë rritur jashtë vendit. Sigurisht që ka pasur shumë ndikim dhe histori të ndryshme. Siç e di, shumë prej tyre në kohën kur Kosova ende nuk ishte pranuar ndërkombëtarisht luanin për ekipin kombëtar të Zvicrës, për shembull si Xherdan Shaqiri dhe të tjerë. Ata ishin ndër lojtarët më të mirë që mund të kishin luajtur për Kosovën, por në atë kohë Kosova nuk ishte e pranuar. Por e dini, të gjithë këta lojtarë ndiejnë shumë për Kosovën, sepse prindërit e tyre kanë qenë të detyruar të largohen dhe të integrohen në një vend tjetër. Megjithatë, ata janë rritur me rrënjët e vendit të tyre. Dhe e dini, Agimi, Federata dhe ekipi kombëtar e kuptojnë këtë dhe dinë t’i prekin ato ndjenja. Mendoj se kjo është shumë e rëndësishme, sepse identiteti i vendit është diçka thelbësore. Jemi miq me të gjithë, por duhet ta ndiejmë se zemra rreh për vendin dhe për popullin e Kosovës. Është pikërisht kjo ndjenjë krenarie që do t’ju sfidoja ta mbani gjallë”, shtoi Infantino.

Duke folur për ndikimin e programeve ndërkombëtare, Infantino vlerësoi punën e FFK-së dhe rolit të saj në zhvillimin e futbollit: “Mendoj se ndikimi që FIFA dhe UEFA kanë këtu në Kosovë është shumë i madh, por gjithashtu duhet të them se ne i japim çdo vendi të njëjtin buxhet, pastaj varet nga vendi se si e përdor atë. Zhvillimi i ekipeve të të rinjve dhe talenteve nuk do të dalë në pah nëse nuk punojmë për të dhe nuk e mbështesim atë. Bota është me të vërtetë e jashtëzakonshme sepse, sigurisht, është një vend i ri, një vend që po ndërtohet ende. Kontributi i futbollit në vend është shumë i rëndësishëm. Federata ka bërë punë të jashtëzakonshme dhe i përgëzoj për gjithçka që kanë bërë deri më tani. Hapi tjetër duhet të jetë bashkëpunimi i UEFA-s, FIFA-s dhe qeverisë për të investuar në infrastrukturë dhe edukim të lartë për futbollin”, tha ai.

Kombëtarja e Kosovës do të luajë sot (e premte) ndaj Sllovenisë në kuadër të ndeshjeve kualifikuese për Kupën e Botës 2026.

Dardanët janë nikoqir të sllovenëve në ndeshjen e tretë të Grupit B, e cila pritet të zhvillohet në stadiumin Fadil Vokrri në Prishtinë me fillim nga ora 20:45.

Ekipi i Franco Fodas vjen në këtë përballje nga një fitore e madhe ndaj Suedisë dhe synon tri pikët e radhës për të vazhduar ëndrrën e kualifikimit.

Në anën tjetër, ekipi i Matjaz Kek vjen nga një humbje e rëndë nga Zvicra dhe do të tentoj këndelljen me një rezultat pozitiv.

Te Kosova mungojnë Amir Rrahmani dhe Lumbardh Dellova, teksa fubollistët tjerë janë të gjithë të gatshëm për lojë.

Presidenti i Federatës së Futbollit të Kosovës, Agim Ademi, është zgjedhur anëtar i Komitetit për Marrëdhënie Institucionale të FIFA-s, një prej komiteteve më të rëndësishme të kësaj organizate globale.

Ky emërim përfaqëson një sukses të madh për futbollin kosovar dhe është pa dyshim një njohje ndërkombëtare e kontributit të vazhdueshëm të presidentit Ademi në zhvillimin dhe avancimin e futbollit, jo vetëm në Kosovë, por edhe në skenën ndërkombëtare.

Komiteti për Marrëdhënie Institucionale ka një rol kyç brenda strukturave të FIFA-s. Ai këshillon dhe ndihmon FIFA-n në ndërtimin dhe ruajtjen e marrëdhënieve me institucionet më të larta ndërkombëtare, si: Komitetin Olimpik Ndërkombëtar (IOC), Kombet e Bashkuara (OKB) dhe agjencitë e saj si UNESCO e UNICEF, organizatat qeveritare dhe joqeveritare në mbarë botën, si dhe shoqata të tjera ndërkombëtare të sportit.

Përmes këtij komiteti, FIFA ndërton ura bashkëpunimi për të promovuar vlerat e futbollit, si: përfshirja, barazia, paqja dhe zhvillimi i qëndrueshëm nëpërmjet sportit.

Përzgjedhja e presidentit Agim Ademi si anëtar i këtij komiteti është një dëshmi e rritjes së peshës së Kosovës në futbollin ndërkombëtar dhe një hap përpara drejt integrimit dhe diplomacisë sportive të mëtejshme të institucioneve të sportit kosovar në strukturat më të larta botërore.

Pas zgjedhjes në këtë komitet, presidenti Ademi ka deklaruar se ky emërim është një nder dhe përgjegjësi e madhe për të personalisht, por edhe për FFK-në si institucion: “Jam i nderuar që do të kontribuoj në një komitet kaq të rëndësishëm të FIFA-s. Ky është një sukses për gjithë futbollin kosovar dhe një dëshmi se puna jonë po vlerësohet në nivelet më të larta ndërkombëtare”.

Ky rol i ri i presidentit të FFK-së pritet të forcojë më tej pozicionin e Kosovës në arenën ndërkombëtare dhe të sjellë mundësi të reja për bashkëpunime dhe projekte zhvillimore në të ardhmen.

Të rikujtojmë se presidenti Ademi është edhe anëtar i Komitetit HatTrick të UEFA-s, që po ashtu është njëri prej organeve më të rëndësishme të UEFA-s.