Në Arabinë Saudite, futbollistët dhe trajnerët profesionistë janë të njohur për pagat marramendëse. Tani edhe Franco Foda ka marrë një ofertë nga shkretëtira. Çfarë do të bëjë ish-trajneri i Sturm Grazit pas ofertës shumëmilionëshe nga Al Wahda?

Për mediat në Arabinë Saudite, praktikisht, ishte punë e kryer. “Franco Foda e merr drejtimin e klubit Al Wahda nga Abu-Dhabi, kontrata është gati për nënshkrim”, ishte titulli i një gazete arabe, shkruan gazeta austriake “Krone”.

Por, arabët nuk po lëvizin aq shpejt. Në fund të fundit, ish-trajneri i Sturm Grazit, ka ende kontratë me Kosovën.

“Franco Foda e injoron joshjen nga shkretëtira”, është titulli i gazetës së madhe austriake “Laola 1”.

Tutje, gazeta austriake ka shkruar se Foda e ka refuzuar një ofertë fitimprurëse nga Emiratet e Bashkuara Arabe.

Foda e ka konfirmuar qëndrimin e tij te Kosova.

“Udhëtimi ynë nuk ka mbaruar ende. Unë dhe ekipi im duam të arrijmë diçka”, citohet të ketë thënë ish-trajneri i Sturm Grazit për gazetën “Krone”. Me Sturm Grazin ka fituar titullin dhe Kupën e Austrisë.

Trajneri gjerman Franco Foda, e kishte udhëhequr me sukses Austrinë nga viti 2017 deri në vitin 2022. Nën drejtimin e Fodas, Austria luajti në Kampionatin Evropian të vitit 2021.

Al Wahda, ekip me bazë në Abu-Dhabi, është prej ekipeve më të suksesshme në Emiratet e Bashkuara Arabe. Në disa media arabe është bërë e ditur se Al Wahda është klubi i vetëm aktualisht pa trajner.

59-vjeçari, Foda, e mori drejtimin e Kosovës në shkurt të vitit 2024 dhe ka kontratë deri në verën e vitit të ardhshëm.

Kombëtarja e Kosovës në futboll ka shënuar ngritje nën drejtimin e trajnerit gjerman.

Kosova nën drejtimin e Fodas i ka shënuar nëntë fitore, ndërsa ka edhe katër humbje. Një humbje e ka me rezultat zyrtar ndaj Rumanisë. Dy fitoret më të rëndësishme janë ndaj Islandës në plejofin e Ligës së Kombeve. Falë dy fitoreve, Kosova, edicionin e ardhshëm do të paraqitet për herë të parë në Ligën B të Ligës së Kombeve.

Krahas rezultateve pozitive, me Fodan selektor, janë afruar edhe shumë lojtarë të rinj. Së fundi, për Kosovën ka pranuar të paraqitet Veldin Hoxha.

Kryetari i FFK-së, Agim Ademi, për KOHËN, të enjten, tha se Foda do të mbetet trajner i Kosovës.

“Ishte një bisedë normale. Biseduam për ndeshjet e radhës. Nuk ka pasur diçka. Ai nuk ka thënë asnjëherë që do të shkojë. Thjesht ka pasur një ofertë shumë të mirë”, tha Ademi për KOHËN të mërkurën.

Prej shtatorit, për Kosovën fillojnë kualifikimet për Botërorin 2026. Ndeshjen e parë e ka më 5 shtator ndaj Zvicrës në udhëtim. Më 8 shtator e pret Suedinë në Prishtinë. Në grupin B është edhe Sllovenia.

Ish-kampioni olimpik dhe botëror në peshëngritje, iraniani Kianoush Rostami, do të përfaqësojë Kosovën. Shtangisti 33-vjeçar është pajisur me pasaportën e Kosovës dhe tashmë është gati për të konkurruar për përfaqësuesen dardane.

Lajmin e ka dhënë vetë Astrit Hasani, presidenti i Federatës Europiane të Peshëngritjes, njëkohësisht edhe president i Federatës së Kosovës.

Gjatë një komunikimi në podkastin “Sportfolio” në Radio Dukagjini, Hasani ka njoftuar se që prej datës 2 korrik të këtij viti, iraniani Rostami do të garojë për flamurin kosovar.

“Një lajm tjetër i mirë për Kosovën është se ish-kampioni olimpik Kianoush Rostami nga Irani ka pranuar që të garojë për ne, duke nisur 2 korriku i këtij viti. Rostami do të marrë pjesë për Kosovën në Kampionatin Botëror, që do të mbahet në Norvegji dhe ne presim që të fitojmë medalje botërore. Me këtë rast dua të falënderoj presidenten e republikës, e cila në afat rekord i ka mundësuar marrjen e shtetësisë dhe tashmë ne e kemi dorëzuar pasaportën e Kosovës në Federatën Botërore”, shprehet fillimisht Hasani, teksa më tej shton:

“Federata e Iranit fillimisht ne premtoi që do ta nënshkruante në Bahrejn, por në momentin e fundit nuk e mbajti fjalën. Por tashmë Federata Botërore e ka marrë vendimin, pasi bordi ekzekutiv ka vendosur që duke nisur nga data 2 korrik 2025 Rostami është gatshëm për të përfaqësuar Kosovën”.

Ndërkohë, i pyetur nëse do të jetë problem mbërritja e peshëngritësit në Kosovë në një kohë kur lufte mes Izraelit dhe Iranit, kreu i federatës kosovare sqaron: “Gjithmonë ka alternativa dhe ne jemi në kontakt çdo ditë me peshëngritësin. Ai ka qenë në Kosovë edhe më herët dhe shumë shpejt pritet që të vijë në Kosovë për të përfaqësuar ekipin tonë”.

Kianoush Rostami, i cili më 23 korrik do të mbushë 34 vjeç, ka një palmares për t’u admiruar në karrierën e tij, edhe pse suksesi i tij i fundit në nivele të larta ndërkombëtare i përket vitit 2020, si kampion i Azisë.

Iraniani ka fituar medalje të artë olimpike në “Rio 2016” dhe argjend në “Londër 2012”.

Ai është shpallur dy herë kampion bote në vitet 2011 dhe 2014, si dhe një herë nënkampion në vitin 2015.

Presidenti i FFK-së, Agim Ademi, ka dhënë detaje konkrete mbi zhvillimet në ndërtimin e Kampit Nacional të Kosovës, një projekt kyç për të ardhmen e futbollit kosovar dhe një bazë moderne për zhvillimin e të gjitha ekipeve kombëtare.

“Në aspektin e infrastrukturës Kampi Nacional është prioritet. Por, paralelisht me kampin po vazhdojmë edhe me projektin çdo 45 ditë nga një fushë për klube. Kampi në Hajvali është në proces të punës, në përfundim e sipër janë tribunat. Shumë shpejt do të përfundojë ndërtimi i vrazhdë dhe do të niset me ulëset, me ndarjen e zonave VIP etj. Bari aktual do të transferohet në njërën nga dy fushat tjera të kampit, derisa në stadiumin kryesor, që do të ketë diku rreth 15 mijë ulëse, do të jetë fusha hibride e ngjashme me atë në ‘Fadil Vokrri’”, tha Ademi në RTK.

Ademi konfirmoi se në këtë kompleks do të vendosen edhe zyrat e Departamentit të Edukimit dhe të sektorit teknik, duke përfshirë trajnerët dhe team-menaxherët e kombëtareve. Një sallë moderne për operacione dhe rigjenerim do të jetë pjesë përbërëse e kampit, për t’iu shërbyer lojtarëve në rast lëndimesh.

“Plani është që deri në fund të këtij viti të përfundojnë punimet e jashtme dhe më pas të kalojmë në ndërtimin e pjesës së brendshme, përfshirë hotelin dhe SPA-në. Inaugurimi i kampit pritet në shtatorin e vitit të ardhshëm me një ndeshje të yjeve botërore kundër veteranëve tanë”, tha Ademi.

Stadiumi i Kampit do të jetë i kategorisë 4+, çka e bën të përshtatshëm edhe për ndeshjet e Kombëtares A. Por Ademi paralajmëroi se Kombëtarja do të jetë prezente edhe në qytete të tjera në të ardhmen.

“Nëse përparon infrastruktura edhe në Gjakovë, Gjilan apo Pejë, atëherë Kombëtarja do të luajë në të gjitha këto qytete. Ajo është e të gjithëve”, nënvizoi presidenti i FFK-së. E sa i përket infrastrukturës, ai edhe një herë u shpreh i gatshëm për Memorandume Bashkëpunimi me të gjitha komunat për ndërtimin e fushave të futbollit, derisa tha se prioritet për vitin e ardhshëm do të jetë krijimi i kushteve më të mira në stadiumet e klubeve dhe vendosja e reflektorëve, në mënyrë që ndeshjet të zhvillohen në orët e përshtatshme të mbrëmjes.

Xhudistja kosovare, Distria Krasniqi, ka fituar medaljen e argjendtë në Kampionatin Botëror që po mbahet në Hungari.

Distria e nisi me fitore garën në raundin e 32-të, pasi ishte më superiore se kundërshtarja e saj braziliane, Jessica Pereira, të cilën e mposhti me ippon, pasi më parë mori edhe një yoko dhe një ëaza-ari.

Pasi mposhti kundërshtaren braziliane, Jessica Pereira, në raundin e dytë, Distria ishte superiore edhe ndaj Francine Echevarria të Puerto Ricos.

Edhe këtë ndeshje, kampionia jonë e fitoi me ippon, pasi Echevarria kishte bërë tri gabime.

Në çerekfinale, pejania ishte e papërmbajtshme ndaj hungarezes Reka Pupp, të cilën e mposhti me një ‘yuko’ dhe një ‘ëaza-ari’.

Në gjysmëfinale, Distria ishte e papërmbajtshme ndaj spanjolles Ariane Toro Soler, të cilën e mposhti pasi e detyroi t’i bëjë tri gabime.

Në luftën për medalje të artë, Krasniqi fatkeqësisht u mposht në finale nga xhudistja japoneze Uta Abe.

Tifozat Kuq e Zi e kanë vazhduar përplasjen në distancë me Federatën Shqiptare të Futbollit.

Tifozët zyrtarë të Kombëtares shqiptare janë ankuar sot përmes një postimi se FSHF-ja ka kërkuar nga zyrtarët e stadiumit në Letoni që të bëjnë kontrolle të detajuara ndaj tifozëve shqiptarë në hyrje të stadiumit në Riga, shkruan “Gazeta Express”.

Tifozat Kuq e Zi tutje thonë se “kjo mund të jetë koha e maskarenjve, por që atdheu mbetet i shqiptarëve.”

Sidoqoftë, ata u futën në stadium me simbole dhe me flamurin e UÇK-së mbrëmë në barazimin e Shqipërisë me Letoninë, 1:1.

Më poshtë mund ta lexoni postimin e tifozëve zyrtarë të Kombëtares shqiptare. /Gazeta Express

Kombëtarja shqiptare do të zbresë përsëri sonte në fushën e blertë, tri ditë pas barazimit në shtëpi me Serbinë.

Kuqezinjtë do ta vizitojnë Letoninë, ku do t’i kërkojnë tri pikë për t’i mbajtur gjallë shpresat dhe gjasat për kualifikim në Botërorin 2026.

Shqipëria i ka grumbulluar katër pikë nga tri ndeshje, prej tyre një fitore, një barazim e një humbje, shkruan “Gazeta Express”.

Andaj, trupa e Sylvinhos nuk ka më vend për gabime nëse dëshiron ta synojë kualifikimin historik në Kupën e Botës.

Trajneri brazilian e sheh si të rëndësishme sfidën e sontme, e cila sipas tij duhet të luhet për t’u fituar.

“Në futboll ka gjithmonë presion. Tashmë i kemi bërë tri ndeshje dhe na kanë ngelur edhe pesë. Duhet të mbledhim sa më shumë pikë. Letonia e ka mundur Andorrën. Nuk mund të them vendimtare, por është ndeshje e rëndësishme. Duke e krahasuar skuadrën me dy vite më parë, është rritur presioni. Letonia ka skuadër fizike dhe mund të luajë me skema të ndryshme. Luan një lloj futbolli të kodifikuar. Ka 2-3 lojtarë shumë të shpejtë që mund ta bëjnë diferencën”, deklaroi selektori i Shqipërisë.

Kuqezinjtë vijnë nga barazimi pa gola i së shtunës me Serbinë në Tiranë, i cili ua zbehu sadopak gjasat për kualifikim në Botëror.

Sidoqoftë, Gjimshiti me shokë do ta tentojnë shkuarjen në Kupën e Botës për herë të parë në histori, deri në momentet e fundit.

Ndeshja mes Letonisë dhe Shqipërisë do të luhet sonte duke filluar nga ora 20:45.

Kombëtarja e Kosovës ka shënuar fitore me rezultat 4-2 ndaj Komoreve në stadiumin ‘Fadil Vokrri’.

Protagonist kryesor i kësaj fitoreje ishte padyshim sulmuesi Albion Rrahmani.

Rrahmani realizoi het-trik në këtë ndeshje, teksa në total ka shënuar pesë gola në dy miqësoret e këtij muaji.

Pas fitores ndaj Komoreve, Rrahmani u shpreh tejet i lumtur me paraqitjet e tij në një prononcim të shkurtër për RTK.

“Jam shumë i kënaqur me këto dy ndeshje. Jam shumë i lumtur dhe krenar që arrita ta ndihmojë kombëtaren”.

“Topi i ndeshjes pas hat-trickut do jetë kujtim shumë i bukur”.

“Foda më tha 2 ndeshje, 5 gola nuk është keq”, tha Albion Rrahmani.

Presidenti i Federatës së Futbollit të Kosovës, Agim Ademi, ka kujtuar figurën e paharrueshme të Fadil Vokrrit në shtatëvjetorin e ndarjes së tij nga jeta, përmes një postimi emocional në rrjetet sociale. 9 qershori i vitit 2018 mbetet një nga datat më të dhimbshme për komunitetin e futbollit në Kosovë, pasi la pas një boshllëk që ende ndjehet në çdo cep të këtij sporti.

Ademi theksoi se Fadil Vokrri ishte shumë më tepër se një futbollist i jashtëzakonshëm – ai ishte mishërim i pasionit, përkushtimit dhe dashurisë së pakushtëzuar për futbollin dhe për vendin.

Postimi i Ademit:

9 qershori i vitit 2018 mbetet një nga datat më të dhimbshme për komunitetin e futbollit në Kosovë. Ndarja nga jeta e Fadil Vokrrit na la pa ikonën tonë më të madhe, por trashëgimia që ai na la pas vazhdon të na frymëzojë çdo ditë.

Fadil Vokrri ishte më shumë se një futbollist. Ai ishte mishërim i pasionit, përkushtimit dhe dashurisë së pakushtëzuar për futbollin dhe për vendin. Me talentin e dhuruar nga Zoti dhe me përkushtimin që e karakterizonte në çdo hap të jetës, ai fitoi zemrat e të gjithëve, që nga ditët e para me fanellën Llapit e Prishtinës, e deri te paraqitjet në skenën ndërkombëtare.

Aftësitë me topin, vizioni në lojë dhe karizmi i tij bënë që ai të shndërrohej në idhull për tifozët dhe një model për shumë breza të futbollistëve.

Kontributi i tij për futbollin nuk përfundoi me mbylljen e karrierës si lojtar. Pas disa vitesh të kaluara në Francë, ku jetoi me familjen, ai vendosi të rikthehej në atdhe, fillimisht me misionin për të ngritur profesionalizmin në klubin ku u bë i famshëm, KF Prishtina, e më pas për të marrë udhëheqjen e futbollit të Kosovës. Me autoritetin që gëzonte dhe me mbështetjen e të gjithë komunitetit të futbollit Fadil Vokrri e udhëhoqi misionin historik të anëtarësimit të Kosovës në UEFA dhe FIFA.

Ai e trasoi rrugën e nisur nga ish-kryetarët e FFK-së, Agim Bytyqi, Rexhep Abdullahu e Sabri Hashani, së bashku me bashkëpunëtorë të palodhshëm. Me përpjekje të pandalshme dhe me përkrahjen e institucioneve vendore dhe faktorëve ndërkombëtar, Kosova arriti më në fund të bëhet anëtare e UEFA-s dhe FIFA-s në maj të vitit 2016, në Budapest.

Shtatë vite pas ndarjes së tij nga jeta, kujtimi për Fadilin është më i gjallë se kurrë. Ai mbetet ikonë e futbollit mbarëkombëtar dhe një figurë që do të jetojë përherë në historinë e sportit tonë.

Në këtë ditë përkujtimore, i shprehim mirënjohjen më të thellë për gjithçka që bëri për futbollin dhe për Kosovën. Karriera e tij si futbollist ka qenë dhe mbetet si udhërrëfyes për brezat e rinj.

Le të shpresojmë që në këtë ditë përkujtimi, në stadiumin që me krenari mban emrin e tij, Kosova do të arrijë fitoren e radhës kundër Komoreve, si një dedikim i denjë për Legjendën.

I përjetshëm kujtimi!

Me respekt,

Agim Ademi, president i FFK-së

Sonte pata kënaqësinë e veçantë të mirëpres në Prishtinë një mik të vjetër dhe të çmuar të futbollit tonë, z. Jérôme Champagne, i cili po qëndron në Kosovë me ftesën time. Vizita e tij përbën një ngjarje të veçantë për të gjithë ne që e kemi ndjekur nga afër rrugëtimin historik të Kosovës drejt pranimit në UEFA dhe FIFA, ka shkruar Presidenti i FFK-së, Agim Ademi.

Më pas ai ka shtuar: Z. Champagne, ish-zyrtar i lartë i FIFA-s, ka qenë një nga mbështetësit më të mëdhenj të kauzës sonë për afirmim ndërkombëtar. Ai është njeriu që hartoi dosjen e parë të aplikimit për anëtarësimin e Kosovës në institucionet më të larta të futbollit botëror dhe ka luajtur rol kyç në këtë proces të ndërlikuar dhe historik.

Gjatë asaj periudhe, përveç angazhimit të tij në Federatën e Futbollit të Kosovës, ai kishte zhvilluar edhe takime me ministrin e atëhershëm të Kulturës, Rinisë dhe Sportit, z. Memli Krasniqi, me të cilin u dakorduam për hapat e përbashkët drejt anëtarësimit.

Në një darkë miqësore të zhvilluar në Prishtinë, patëm rastin të kujtojmë sfidat e shumta që kemi kaluar së bashku, si dhe sukseset që i kemi arritur falë përkrahjes së sinqertë të njerëzve me vizion si z. Champagne. Miqësia e tij me legjendën tonë të paharruar, Fadil Vokrri, si dhe afërsia me ish-presidentin e FIFA-s, Sepp Blatter, ishin vendimtare në ndërtimin e një mbështetjeje të fuqishme diplomatike për Kosovën në arenën ndërkombëtare.

Kontributi i tij ka lënë gjurmë të pashlyeshme në historinë e futbollit të Kosovës dhe ai do të mbetet përherë pjesë e saj.

Edhe sot, z. Champagne vazhdon të jetë mbështetës i çështjes sonë, duke ofruar ndihmë profesionale e organizative sa herë që i jepet rasti dhe aty ku përvoja e tij mund të bëjë ndryshim.

Në shenjë mirënjohjeje për kontributin e pakursyer ndër vite, i dhurova atij një fanellë të Kombëtares së Kosovës. Ai na përgëzoi për të arriturat e deritanishme dhe për organizimin pas anëtarësimit në UEFA dhe FIFA, si dhe na uroi fat dhe suksese në ciklin kualifikues të Kampionatit Botëror 2026.